እንቋዕ ካብ ዘመነ ማርቆስ ናብ ዘመነ ሉቃስ ብሰላም ኣሰጋገረና!!

“ናይዚ ዓመት እዚ ፍረ እክሊ ትባርክ፤ እቶም እምባታትን ኮረቢትን ብጠሊን ብልምላሜን ይጸግቡ፤ እቶም ምድረ በዳን ሰሃራን ከኣ ረውዮም ይነብሩ” (መዝ 65 ፡ 11)

በስመ ኣብ ወወልድ ወመንፈስ ቅዱስ ፩ ኣምላክ ኣሜን!! ክቡራት ሰማዕተይ ኩልኹም ናይ ድምጺ ተዋህዶ ደሓንዶ ውዒልኩም እንቋዕ ካብ ዓመት ናብ ዓመት ብሰላም ኣሰጋገረና ርሑስ ዘመነ ሉቃስን ርሑስ በዓል ቅዱስ ዮሐንስን ቡሩኽ ኣውደ ዓመትን ይግበረና እንቋዕ ካብ ዘመነ ማርቆስ ናብ ዘመነ ሉቃስ ብሰላም ኣብጽሓና። ዘመነ ራህዋን ፡ ዘመነ ቅሳነትን፡ ዘመነ ህድኣትን ሰላምን፡ ዘመነ ምሕረትን ቅሳነትን ንኽገብረልና ናይ ኵሉ መዓልቲ ጸሎተይን ናይ ወትሩ ትምኒተይን እዩ። ናይ ሎሚ ወንጌላዊ ሉቃስ 2015 ፪፻፲፭ ዓመተ ምሕረት ግእዝ 2015 ፈረንጅ እዩ። እግዚኣብሔር ኣምላኽና ቅድሚ ዓለም ሥላሴ ብሐድነት ሰለስትነትን ይምስገኑ ነበሩ። መን የመስግኖም ነበረ እንተ ተባህለ፤ ባህርዮም። ብባህርዩ ይምስገን ነበረ ዝብል መልሲ ኢና ንረክብ። ወይእዜኒ ኣንተ ኣባ ሰብሐኒ በስብሐትየ ዘሀሎ ምስሌከ እምቅድመ ይትፈጠር ዓለም ብዝበሎ ይፍለጥ። ትርጉሙ "ኦ ኣቦይ ሕጂ ድማ በቲ ቅድሚ ዓለም ከይተፈጥረት ኣባኻ ዝነበረኒ ኽብሪ ኣኽብረኒ። " ዮሐ 17 ፤ 5 ደሐር ግን ዓለም ክፈጥር ኢሉ ሐሰበ ስብን መላእክትን ድማ ፈጠረ። ምክንያቱ ስሙ ንምቅዳስ ክብሩ ንውራስ ኢሉ ፈጠሮም። ካልእ ፍጥረት ዝተረፈ ፍጥረት ግን ንኣንክሮ ንተዘከሮ ንምግቢ ሥጋ ኢሉ ፈጠሮም።

•••••